Noman Çelebicihan

NOMAN ÇELEBİCİHAN

(1885 — 1918)

N.Çelebicihan 1885 senesi Or uyezdiniñ Sonaq köyünde doğdı. Yerli mektepte, soñra Kezleve medresesinde tasil aldı. 1908-1916 seneleri İstanbul ve S.-Peterburg universitetlerinde oqudı. Uquq ve tıb fenlerini mükemmel ögrendi. 1908 senesi Cafer Seydamet ve başqa qırımtatar gençleri ile türk inqilâbında iştirak etti. Aynı zamanda „Qırım talebe cemiyeti"ni teşkil etip, halqımıznı çar ükümetiniñ zulumından qurtulması içün çalıştı.
    1917 senesi mart ayında Qırım müftisi ve soñra Qırım Musulman İcra Komitetiniñ reisi olaraq saylandı. Ukümet başında eken, milletimizniñ durumını bus-bütün deñiştirmek ve milliy medeniyetimizni ostürmek içün büyük ğayret ve sebat kösterdi.
1918 senesi fevral 23 kunü bolşivikler tarafından kiyikcesine qatil etildi.
    N.Çelebicihan öz şiirlerini gençlik çağında yazmağa başladı. Büyük istidat ile yazılğan lirikası felsefiy mizacı ile ayırılıp tura. Bir sıra eserlerinde derin vatanperverlik duyğuları açıq körüne. „Ant etkenmen!" şiiriniñ metni şimdi halqımıznıñ gimnidir. Çoban qızı" (1912), „Bastırıq" (1913), „Tatarlar yurdu" (1914), „Yolcu ğarip" (1916), „Sarı lâle" (1917) kibi şiirlerinde ince lirika ile yüksek milliy pafos ve azadelik nağmeleri terennüm etile.
    N.Çelebicihannıñ 1913 senesi yazğan „Qarılğaçlar duvası" ikâyesi aqqında Cafer Seydamet Qırımer böyle dedi: „Bu ikâye, qırım türkleri edebiyatınıñ ölmez bir parçası olaraq, daima quvetini muhafaza etecektir!"

İsmail Asanov / Eki devir arasında. – 1995.