Irğat Qadır

Портрет: 

(1905-1945)

Irgat Qadır (Halil Cemil oğlu Qadırov) 1905 senesi Aluşta rayonınıñ Uskut köyünde dünyaga keldi. Babadan erte öksüz qaldı. Anası dert balanı baqıp, büyütmek zorunda olğanından, Halil yaş bala ekende ırğatlıq yapmağa mecbur oldı.

1921 senesi Halil Qadırov işçiler fakultetine (Rabfakka) kirip oqumağa nail oldı. Aradan sekiz yıl keçken soñ, 1929 senesi Qırım pedagogika institutınıñ filalogiya fakultetine kirdi. Yaş ekende şiirler yazıp başlağan ırgat Qadırnıñ "Irğatnıñ yırları" adlı birinci şiirler kitabı şu yılı basılıp çıqtı.

İnstitutnı bitirgen soñ, 1931 senesi şairniñ "Ücüm" adlı ekinci şiiriy kitabı neşir etildi. SSSR Yazıcıları birliginin birinci qurultayında o teftiş komissiyasına aza saylandı.

1936 senesi Irgat Qadırnıñ "İsmail" adlı poeması ayrı kitap alında basıp çıqarıldı.

Ulu Vatan cenki başlanğanınen, Irgat Qadır cebege ketti. Gvardiya üyken leytenantı rutbesinde cenk etti. Can alınıp-berilgen uruşlarda dört kere yaralandı. "Vatan cenki" ordeninen mukâfatlandı. 1945 senesi yanvar 26-da Kenigsberg içün alınıp barılgan uruşlarda qaramanlarca elâk oldı. Popendorf köyü yanındaki Pilau degen yerde defn etildi.

Şairniñ bazı şiirleri ve "İsmail" poeması "On ekilerniñ hatiresi" (1970) ve "Edebiyat hrestomatiyası" (1971) kitaplarına kirsetildiler.

Irgat Qadır Yazıcılar birliginiñ azası edi.

http://tatar.orgfree.com