Ответить на комментарий

İdris  Çelebi oğlu Asanin 1927 senesi, sentâbr 13-te Kuybışev rayonınıñ Foti-Sala köyünde doğdı,  tasilni ana tilinde aldı.

1944 senesi sürgünlik neticesinde Üzbekistanğa Samarqand vilâyetiniñ Mitan rayonına tüşti. 1950-1956 senelerini İdris ağa GULAGnıñ şimalindeki qurucılıq obyektlerinde ötkerdi. 1987 senesi İ.Asanin Merkeziy Teşebbüsçi gruppanıñ, 1989 senesi Qırımtatar Milliy Areketi teşkilâtiniñ  azası oldı. 1990 senesi Qırımğa köçti. Vatanda o bir sıra şiiriyet cıyıntıqları ve büyük emek sarf etilgen, milletperver sımalarımızğa bağışlanğan "Adalet küreşi saflarında" adlı üç cıltlı kitapnı çıqarmağa nail oldı. O "Azizler" cemiyetini meydanğa ketirdi ve oña yolbaşçılıq yaptı.
6 avgustnıñ sabasında Bağçasarayda 80 yaşı arfesinde bulunğan İdris Çelebi oğlu Asannıñ yüregi uruvdan toqtadı.
2009 senesiniñ başında ömür arqadaşı Lemara apte İdris Asaninnıñ arhivini kütüphanemizge teslim etti.
 
Bir qaç ay devamında arhiv üstünde hadimlerimiz Bağçasarayda çalıştı. 
Aprelnıñ 17-de İdris Asaninniñ arhivi bizim kütüphanemizge ketirildi ve taqdimnamesi ötkerildi.
 
Bütün  vesiqalar baqıldı ve er bir papka mevzu boyunca tizildi.
Umumen arhiv 231 papkadan ibaret. Bulardan 29 papkanı İdris Asaninniñ şiir qaralamaları,
                          
34 papka öz içine 317 milliy areketimizniñ  faal iştirakçileri aqqında "Adalet küreşi saflarında" 3 cıltlıq kitabına toplağan malümatnı ala, 78 papka umumen milliy areketimizge ait vesiqalar: informatsiyalarnıñ toplamı, halqımıznıñ yuqarı partiya organlarına muracaatları, arizaları, mektüpleri teşkil ete.
 
İdris ağa halqımıznıñ tarihı ve edebiyatı ile de pek meraqlana edi, em de bu mevzuda vesiqalar 73 papkanı teşkil ete.  Bularnıñ arasında cenkten evel bastırılğan kitaplar ve olarnıñ kopiyaları, "İleri" jurnalınıñ, "Azat Qırım" gazetası milletimiz içün pek qıymetli hazine olacağına biz ümüt etemiz.
 
İdris ağanıñ epistolâr fondın milliy areket iştirakçileri ve olar aqqında mektüpler teşkil ete, ve bu mevzuda  fotoresimler de  çoq.