Номан Челеби – джиан

Айгиди татар яшлары!

Айгиди татар яшлары, окъумайлар!

Эренлерге эш болып, ёл къувмайлар.

Башта акъыл бар экен, козьде къарув,

Корьмей, бильмей юрьмектен утанмайлар!

Айгиди татар яшлары, окъумайлар!

Окъусалар кимседен кем къалмайлар.

Истанбулда, Парижде биринджи бола,

Японлар да онларгъа еталмайлар.

Айгиди татар яшлары, ёкъ башлары,

Тёрелермен тёрде оськен ёлбашлары.

Ёлбашлары болмагъанда хорлыкъ корип,

Къайда барса тёкелер козь яшлары.